"Ciaccole non fa frittole" diseva i nosrti vecci, e mai come oggi, gavemo l'esempio, che i gaveva ragion. Son sicura che chi legge queste righe,concorderà con mi. Ormai, sè diventà l'usanza, de festeggiar ogni anno, "Il giorno della memoria". Poteria andar anche ben, che, fra tutte le feste Italiane, sia riconosciuda una anche per noi, Italiani due volte, come ne gaveva definì l'allora Presidente Ciampi (una perchè lo erimo, l' altra perchè gavemo optà per restar tali) e lo ringrazio de cor ancor oggi.
Quest' anno poi, el tono se stà ancora maggior. Grande festa a Roma, presente el simpatico sindaco Alemanno, lo ringrazio calorosamente. Minuti de silenzio, voludi al Senato dal Presidente on.Schifani, per comemorar le vittime. Grazie infinite.
Sempre grata all'on.La Russa, sempre presente con i GIuliani. Quest' anno la novità poi se stada la visita del Presidente della Camera on. Fini, (che gò avù el piaser de conoser quà a Genova a Palazzo Doria), a Trieste, e, per la precision, ai magasini del Molo Veccio, prima tappa del nostro calvario.
Là gavemo stivà le nostre carabattole, tutto quel che gavemo potù portar fora, el resto, tutto el resto sè restà de là con i novi paroni. Caro on. Fini, se solo te potessi aprir el mio cor e far uscir quel che sè chiuso dentro. Altrochè el Museo che i gà fatto oggi, per testimoniar el passato, tutto lustro e luminoso.
Lo dovevi veder come el appariva in quei tempi ai occi de una cratura de otto anni, strappada dall'oggi al doman, da un total ben essere: casa a tre piani,con grande giardin pien de piante e fiori de ogni tipo, negozio sotto la Torre Civica, punto nevralgico della nostra amada Fiume (il tutto documentato da papiri). Per de più, orfana de pare, morto in Egitto, prigioniero degli Inglesi, e de mare, vittima dei nazisti. Man nella man della nonna e del nonno tutori de minore. Altrochè tavole rotonde de psicologi dei nostri giorni, sfido chiunque pol o potrà mai capir.
Per finir, una parola de gratitudine, al presidente on.Napolitano, che comosso, el gà riconosciù el valor delle vittime, dando medaglie ai famigliari in lagrime. Gesto nobile. Ma, me vedè a mì, la Claudia Ciurlizza, contraria ad ogni cerimonial, salir sul podio,e dir…..dir cosa? Grazie! Cosa ghe dirò un doman, ai nipotini, che i sè già oggi, così svei a dodici e tre anni, che i te legge nel pensier, gò ciappà la medaia per nonna Carmen e nonno Bruno, che i sè morti in guerra???
Qual ironia della sorte, pensè, ve parlo de più de cinquant' anni fa, mi, già super critica (la vita me gà forgià ben), disevo alla nonna: a mi i me gà mazzà i genitori, a ti el fio, oggi come risarcimento i nè gà dà la pension de guerra…….
Venimo quindi allo scopo de questo mio sfogo, e me perdonerè. Gò volù con stè righe, anche se con un groppo in gola riconoscer che, o ben o mal, l' importante sè parlar, perciò: GRAZIE.
El giorno però, che verrà resuscitata la pratica,c he si riferisce all'ultima trance, dei nostri "Beni Abbandonati" nella ex Jugoslavia e, che ad onor del vero, era presente nella recente finanziaria (ed ahimè bloccata dal terremoto dell' Aquila) quello sarà veramente el giorno del grazie, un gigantesco "GRAZIE" da un cuore Fiumano, per giustizia ricevuta!!!!!!
Genova, 14 giugno 2010
Claudia Ciurlizza
