Me ricordo che fino ai anni ’80 se gaveva notizie dei fiumani, che i era emigradi in Australia, dala “Voce di Fiume”, che la gaveva una pagina riservada ai nostri concitadini che i se trovava al estero, e sopratuto dal bimensile “El Fiuman”, fondado da Gino Trentini che adesso el continua grazie al impegno dela benemerita Lumi Trentini a Newport. A Melbourne (Stato del Victoria) nel 1963 i gaveva costituido el “Circolo Fiumano Melbourne”; a Sydney (Stato del New South Wales) nel 1972 la “Associazione Fiumani Sydney”; a Perth (Stato della Western Australia) nel 1982 el “Club Fiumano e Giuliano”, a Brisbane (Stato del Queensland) la “Associazione Fiume Brisbane” mentre a Melbourne funzionava dal 1985 anche la Associazion Italo Australiana “Città di Fiume”, presieduta da Pino Bartolomè che gà dovudo ciuder sto anno per mancanza de associati, mentre dei fiumani de Adelaide e Canberra le notizie le xe assai scarse.
Queste organizazioni le xe tutora molto attive per mantegnir i contati, conservar le nostre tradizioni, la nostra cusina, festegiar i Patroni San Vito e Modesto, organizar i Raduni e così via.
A Melbourne, che pubblica periodicamente el elegante notiziario “In Corso Fiuman”, xe Presidente Sergio Csar; a Sydney Carlo Stupar; a Perth Manlio Bertogna e a Brisbane el mio amico a Fiume Iginio Ferlan, che el abitava nel Grataziel vizin del Vescovado e el gaveva negozio in Fiumara.
Verso la fine dei anni ’80 era vegnudo a Genova per presentar el suo novo libro el scritor fiuman Dario Donati e el libro gaveva per titolo “Australia, Australia”, che lui el gaveva scrito dopo gaver visitado i sui amici fiumani in Australia e i vari Clubs.
Me gaveva impressionado queste parole in boca de un fiuman intervistado: “Apena arivadi in Australia, non gavemo avudo grandi problemi de inserimento a parte la lingua per chi che non la conosseva. Noi italiani, greghi, slavi e così via, non gavemo gnente in comun con “’sti quà” (australiani) ne’ per le usanze, ne’ per el magnar, ne’ per el resto.
Per questo preferimo trovarse fra de noi e far i Club, ma questo non el val per i nostri fii e nipoti, che i va pulito e de accordo con i sui coetanei australiani”.
Nel 2002 gavemo visto in una trasmission TV italiana del Paolo Limiti alcune foto de Fiume e sentido la nostra canzon “Cantime Rita in Italian” grazie al interessamento dala lontana Brisbane del nostro Iginio Ferlan, che poi el se gaveva ancora distinto nel 2006 gavendo publicado la racolta de fotografie fiumane col titolo “Ricordo di Fiume” in tre lingue (italian, inglese e spagnolo).
Sucessivamente nel 2009 xe stado publicado el libro scrito da Pino Bartolomè “Esilio e nuova vita sotto la Croce del Sud “, che ne gà contado in maniera molto comovente le tribolazioni subide nele atese de imbarco nei Campi IRO de Napoli e in Germania, i viagi per nave che durava 40-60 giorni, i grandi sacrifici iniziali, le discriminazioni sula nazionalità, e poi finalmente l’inserimento e l’inizio effettivo de una nova vita.
E ancora nel 2009 xe stada la volta de Enrico Pimpini – famoso condutor radiofonico da decenni per i italiani de Australia, che nel 1955 el gaveva fondado la “Rivista Italiana” – al qual ghe era stada conferida la prestigiosa onorificienza italiana dela Stella della Solidarietà.
Fatte queste breve citazioni, in questi giorni la “Associazione Fiumani di Sydney” gà publicado e divulgado un sintetico ma significativo resoconto de 40 anni dela sua atività, anca per sotolinear el passagio del Club dale mani dei Veci alla nova generazion. La publicazion xe stada sponsorizada dala “Associazione Giuliani nel Mondo” de Trieste e la xe stada scrita da Serena Breese, nova Segretaria del Club. El Circolo de Sydney el era scominziado nel 1972 per iniziativa del fiuman de Torretta Luigi Tamburini (Gigi) che el se gaveva dado de far per zercar e riunir la nostra gente sul esempio de quei de Melbourne.
Non era stada una impresa fazile zercar fiumani in una metropoli, e poi anca perchè in arivo dala Europa in bona parte i nostri non i era stadi registradi come italiani, ma jugoslavi o apolidi.
Però con la bona volontà – gaveva pensado el grando Gigi – se ariva a tuto.
E infati lui el xe riussido nel suo intento, ma ancora ogi a lui ghe par incredibile che quela impresa, scominziada squasi per scomessa, la gabi avudo tanto sucesso e gabi ragiunto già i 40 anni.
La prima iniziativa del Gigi xe stada quela de organizar un pranzo de San Vito el 15 Giugno 1972
nel local più cosmopolita de Australia: el Club Marconi – 25.000 Soci de 18 nazionalità e 200 dipendenti – indove che lui el lavorava come Capo Chef.
Grando successo de partecipazion con balo e tombola de beneficienza che gà frutado un bel muceto de dolari australiani, mandado per el 75 % ala “Voce di Fiume” per un maton dela Casa dei Fiumani a Padova e el 25 % a una scola australiana de bambini ritardati.
Bela questa usanza de solidarietà che lori i continua quando che i se incontra: presempio nel 1998 insieme coi chersini i gà ingrumado qualche migliaio de dollari per la ricerca sul cancro del “Children’s Hospital”.
Tuto fa brodo per ingrumar soldi e vien ricordado quando el pitor Ennio Virtich gà dipinto a ojo un quadro dela Tore Civica dela nostra Piazza delle Erbe, che gà frutado un più che simbolico aiuto fiuman al “Prince Henry Hospital”. Fiumani australiani, bravi e sempre generosi! Poi xe seguidi altri incontri anca per Pasquetta con i nostri magnari indimenticabili, capuzi garbi e luganighe, gnochi de susini, pinze e anca gare per le Signore fiumane su chi de lore portava i più boni sisseri. Poi el Gigi gà passado la presidenza in man al Tonci Calderara che el gà messo el massimo de impegno per continuar la strada che el Gigi gaveva aperto con grando sucesso.
Anca el Tonci era un lider carismatico e merita de esser ricordado el Raduno de Geelong quando che – insieme con quei del Circolo Fiumano de Melbourne – i gaveva inventado novi numeri come afidar la bandiera fiumana a una clapa de fiumani ciclisti: Ervino Urizio, Gigi Pimpini, Frank Sanfilippo e Vito Paneghel, e poi – per la racolta dei soldi per la solita beneficienza – el Sandro Dugina e Nevio Rezman i gaveva dipinto la nostra gloriosa Aquila fiumana con due teste “quela che le Signore gaveva regalà”, e un piatin-ricordo per i partecipanti fato dala Silvana Mantello ispirado a ricordi fiumani. Ma non basta, là i gaveva lanciado la canzon “Nostalgia fiumana” scrita dai fiumani de Melbourne Moira e Ruggero Rezman. Un gran bel esempio de colaborazion tra i due Clubs de Melbourne e Sydney.
E poi la Messa de Pasqua celebrada dal Prete fiuman Padre Antonio Radovan, Missionario in Africa, che el era de passagio a trovar el fradel: nol voleva soldi per el suo ministero ma i fiumani del Raduno gà fato gara per darghe un sostegno per quando el sarìa tornado dai sui poveri assistidi.
Poi xe vegnuda la volta dela Presidenza del Mario Stillen Sticovich, mio compagno de scola.
Arrivado a Sydney nel 1950 e “ospite” del Campo de Bonegilla, el primo lavor ghe era stado spacar sassi a Marulan dove ghe era vegnudo mal de schena, poi el gaveva fato el pitor, poi guardia carceraria, e dopo el se gaveva messo in proprio aprendo un restaurant, sistemandose in fine definitivamente e ben con la società Sharp Electrics.
In Associazion el Mario el gaveva aiutado sin da i tempi dela sua costituzion e quando Tonci Tamburini gaveva passado la man lui el gà acetado con entusiasmo la Presidenza. Lui gaveva una gran bela maniera de tratar la gente e el era un Maestro de Public Relations: el usava molto el telefono e lettere, e el era molto orgolioso dela sua fiumanità. El xe stado Presidente dal 1992 al Marzo 2009 e con la sua dinamicità el gà tegnudo vivo e unido el Club regalando fiducia e speranza a chi che a lui se rivolgeva. El era anca un omo de granda compagnia sempre pronto a tirar fora una barzeleta, e nei Raduni non ghe dispiaseva strassinar i altri nel balo e nele cantade e el gaveva anca bele invenzioni come quando a tuti ghe consegnava un picola candelina che nel meso dela festa se impizava fazendo la figura iluminada de Fiume opur quando per San Vito 1999 el gaveva festegiado le “mulete” fiumane novantenni Benita Bertoss e Ada Verhovc con una bela medaja col stema de Fiume fata dal mio cugin Luciano Wiederhofer, incisore de alta qualità. La Presidenza del Mario la xe molto nota anca fra noi taliani e xe stado un peca’ de Dio che el ne gabi lassado così presto.
Qua’ finisse la storia dei primi 40 anni dei Fiumani de Sydney che la descrive anca i vari Raduni fati ogni secondo anno dal 1981 a Melbourne, Sydney, Perth, Brisbane, Adelaide, Geelong e Canberra. Un forte augurio de “Bon Lavor” al novo Presidente dela Associazion Carlo Stupar e al suo Committee: Serena Breese, Segretaria, Ethel Cossutta, Tesoriere, Layla Hall, V.Segretaria, Julie Townsend, Consigliere.
Rudi Decleva 24 agosto 2012
