Ulderico Sergo era nato a Fiume nel 1913 e da esule el se gaveva sistemado prima a Trieste e a Mantova, per poi emigrar nei Stati Uniti dove el xe morto nel 1967 a Cleveland.
Mi gavevo vissudo tuta la atmosfera splendida dele vitorie del nostro “Rico”, ma questo solo dopo le Olimpiadi de Berlino, dato che alora gavevo solo 7 anni, e non quando la popolarità del Sergo la era al massimo tra i diletanti, dove el xe stado campion d’Italia e d’Europa, agiudicandose per ben 3 volte anca el Guanto d’Oro, prestigioso trofeo american.
La sua fama la era cressuda subito dopo el Oro dele Olimpiadi quando – passado al professionismo nela categoria dei pesi “Gallo” – lui gaveva scominziado con sucesso la scalada al titolo italian e a quel europeo. Tuta la mularia erimo davanti al ingresso dela balconada del Teatro “Fenice” una ora prima che scominziassi la serata de box indove altri boxeri diletanti i deveva far de cornice al combatimento clou del Sergo come i fradei Barbadoro, Andressi, Stella, Zivcovich, Persoglia, Buchberger, e altri.
Per noi muli era una vergogna pagar el bilieto de ingresso e stessa roba era per andar a veder la “Fiumana” del Rudi Volk giogar a Cantrida, e quando arivava la massa de gente, non era difizile per noi muleti scampar drento soto del naso del strazabilieti, che magari el ciudeva tuti i due oci mentre che noi credevimo de fregarlo.
Fiume era diventada una piaza che organizava incontri de box tra i più importanti in Italia, con i protagonisti de quela volta a scominziar dal Carnera per finir con el nostro Mario Dobrez, oramai al tramonto, e in palestra de Via Bovio noi mularia erimo abonadi per cucar drento verso le sete de sera, quando che era i alenamenti, per spiar el grande Sergo e i altri protagonisti de quel momento magico sportivo fiuman.
Come che se entrava in palestra, me ricordo che bisognava calarse un diese scalini e me colpiva una grossa scrita sul muro “Vogliamo un popolo di cazzottatori”, con soto la firma inconfondibile de Mussolini, e drento tuti i era impegnadi in alenamento, i saltava cola corda, i bateva el pungibal e qualchedun boxava anca sul ring.
In combatimento, i aversari del nostro idolo non i esisteva, perché un dopo l’altro lui li spazetava con una facilità sorprendente nele dodici riprese.
Sergo era molto tecnico, velocissimo e quando che partiva el suo destro la facia del aversario, che zercava de schivarse, la andava a fermarse drita e come calamitada sul suo pugno, che purtropo non el gaveva potenza, ma era lo stesso importante, perché nela box contava i colpi.
Baterse nei professionisti era impresa ben diversa che contro i diletanti, indove che le riprese era apena 3 contro le 12 de questa categoria, e per questo el boxer el deveva gaver resistenza e fiato.
Sergo nol becava pugni perché el era un mago a evitar i colpi e con la sua granda velocità el tirava uppercut, sventole e direti, e in un atimo el spariva ala reazion del aversario, e in questo modo el supliva ala mancanza de alungo, perché lui non el era alto de statura. E anca el fiato non el andava mal: quel che bastava fin l’ultima ripresa, quando la meritata vittoria ghe vegniva assegnada senza obiezion da parte del aversario de turno o del suo secondo, tanto neta era la sua superiorità. Vitorie nete e schiacianti, degne de un grando campion.
La “Vedetta d’Italia” lo esaltava e non la vedeva l’ora che i tempi de avanzamento nela graduatoria nazional dei valori i se riducessi, per poder finalmente sfidar per el titolo el fenomeno, ma mejo dir el teror de quei tempi, che se ciamava Gino Bondavalli, de Reggio Emilia. Era anca stada publicada – in funzion del primo incontro contro del boxer emilian – una breve storia dela cariera sportiva de Sergo, che la era andada a ruba, e ricordo che in copertiva era la foto dela vitoria conquistada sul ring de Berlino, dove el nero american Jackie Wilson vegniva presentado con una alteza sproporzionada per ingrandir la impresa del nostro campion: Sergo era el picio Davide, vitorioso sul gigante Golia, che era el Wilson.
Me par che se gà fato almeno tre incontri Sergo-Bondavalli tra Fiume e Reggio Emilia, ma mai el nostro campion el xe riussido a vinzer, lassandone sempre molto delusi. El primo incontro el era finido sconfito ai punti per Sergo, mentre el secondo era finido ala pari con el titolo conservado da Bondavalli. E non era andado mejo gnanca el ultimo, con la nostra massima delusion, perché in tuti i incontri, fino ala decima ripresa, puntualmente Sergo era stado in testa nei puntegi, ma poi nele ultime riprese el gaveva cedudo nela fatica e perché ghe mancava el fiato. Specialmente nel incontro per el titolo europeo, indove le riprese era stade 15.
Ma che spetacolo quele prime diese riprese: girandole, sventole, mordi e fuggi, schiva e rispondi: un Sergo, veloce come un fulmine, imprendibile e colpidor de precision. Pecà che sula sua strada el gabi trovado un osso duro come el Bondavalli; ghe sarìa bastado gaver el pugno micidial che gaveva el Stella, quando che el gaveva fulminado el campion del mondo Enekes, ungarese, oro a Los Angeles nei pesi “piuma”. Secondo el Annuario della boxe italiana 2010, a Ulderico Sergo vien acreditadi in campo professionistico 18 incontri, dei quali 7 vinti, 7 persi e 4 paregiadi, ma per noi fiumani lui era sempre vitorioso.
Rudi Decleva
“la Voce del Popolo” 11 agosto 2012
