El Pino dala Australia el descrive quel giorno de granda burasca nel Quarnero; lui el era col suo zio sul Sotomarin. El Sotomarin el era stado afondado dai Austriachi a un 400 metri fora del Porto Petroli e dala Lanterna dela nostra Diga se deveva vogar per un 500 metri, per arivar su de lui. La fondezza era de un 50 metri e el sotomarin non el era pogiado sul fondo ma el gaveva la prova piena de aria e per questo el stava come storto, obliquo se dirìa in lingua italiana. Per questo motivo là se dava apuntamento i scombri e per questo motivo se dava apuntamento anca i pescadori, che i meteva le barche in andana. Questo vol dir che una barca la dava fondo ala sua àncora verso tera e una altra la dava fondo verso fora e poi le se univa. Le altre le fazeva la stessa manovra e poi le se congiungeva fino a esser andane de 4-5 barche. La corente la andava de levante a ponente o viceversa e così tuti i pescava con le togne che le lavorava pulito. Per iesca se tajava la sardela, ma el calimar fazeva furori, primo perchè el era carne dolce, e poi perchè el durava de piu'.
Se pescava a una fondezza de sei-otto passi sotto la barca e i scombri i arivava a ciappi, in muccio e era una assai bela pesca. De domenica se podeva contar anca 8-10 andane per un total de una cinquantina de barche. Pescar a fondo colla canavazza se ciapava sempre qualche bel pesse, ma molte volte se perdeva la togna perchè la se incuzava a fondo su qualche cavo del sotomarin, che ancora a tanti anni de distanza el molava maccie de nafta che sporcava un pochetin quel bel mar azurro che gavevimo noi, che se podeva anca bever. I pescadori più bravi i ciapava i scombri con la panola, che la era fatta de quatro togne che le lavorava contemporaneamente in quatro fondezze: due le era leggere e le se ciamava plitve e le era de fil de seta, mentre le altre due le era fate cola crena de caval e le gaveva i piombini tazzadi che le vadi pescar piu' a fondo. Fra le due togne – la plitva e quella coi piombini – ghe era la treina de un diese passi per far lavorar piu' lontan le altre due. Quando che se ciapava el pesse bisognava esser molto sgai per non ingajar la panola.
Se pescava con la panola alla alba e el mar bojva de sti scombri che così i festegiava el novo giorno. Ma era una pesca molto faticosa perchè bisognava vogar per far caminar le togne e la fame che gaveva i pescadori obligava a cambi molto frequenti. La grabagna la finiva verso le otto ore e allora i pescadori i contava el bottino e el più bravo el dixeva che el gaveva ciapado 120 teste. El mio Padre el me dixeva de contar i nostri e erimo vizini ai bravi, malgrado che mi tirassi la treina passandola drio della schena perchè el padre non el se fidava e el gaveva paura che la perdessi; la panola quela volta la era un capital.
El Pino poi el ricorda la tenda per ripararse dal sol. Da noi in mar era molto caldo de estate e se non ti gavevi la tenda ti ciapavi una brusada in schena, che non ti podevi per giorni dormir in letto. Per questo le barche le gaveva el tendalin che el era formado dala tela larga un pochetin più dela barca, e la tela per el longo la era cusida su due stecche de legno, afinchè la staghi averta. A prova, indove che era el castel, e a pupa indove che era el tambucio, se meteve due aste per tegnir in alto sopra dela testa el tendalin e se ligava ben ben che la tenda la stia in tension. Le stecche del tendalin le vegniva ligade sul bordo della barca in modo che el tendalin el stia ben fermo e nol ciapi aria, perchè se no inveze de far ombra el fazeva vela. E alora sì che diventava un piazer pescar in ombra e con la arietta che la te carezzava, e invece del caldo ti sentivi bel fresco. Poi, quando che el sol andava verso el Monte Maggior se alzava una bela bava de tramontana e non fazeva più tanto caldo. E alora chi che non gaveva la vela usava el tendalin come che ben el gà descrito el Pino.
La tenda diventava vela e la asta de prova la era el albero che la tegniva alzada. Per timonar andava ben el remo verso pupa come le gondole de Venezia, che i lo usa per scia-voga, opur in pupa-pupa a lavorar come un vero timon. E alora sentir la barca che la va da sola, el sol che non el fà più paura, el anfiteatro de Cosala e Belveder che se avizina sempre de più, te vien de dir "cossa ti vol de più?".
Rudi Decleva
