L’ultima volta in sta nostra rubrica in dialeto gavemo scrito de el grande bocser istrian Nino Benvenuti segnalando che, al contrario de Mate Parlov, nato a Spalato ma diventà campion del mondo vivendo a Pola, Nino el xe nato in Istria, a Isola, ma el teto del mondo el se lo ga conquistà da Talian de passaporto.
Simile xe sta anche el destin de un altro tra i più grandi sportivi de l’Istria del XX secolo Mario Andretti de Montona, Istrian anche lui ma diventà campion del mondo de automobilismo in Formula 1, da naturalizà American.
Quei che i ga più de cinquanta anni i se ricorda de sicuro le gare de Formula 1 dei anni Setanta e Otanta, con le mitiche telecronache de Mario Poltronieri. El 1978 per Mario Andretti xe stado l’anno più importante in Formula 1: el ga vinto el suo unico mondial ma, a tre gare dala fine, el ga perso purtropo el suo compagno del squadra, el svedese Ronnie Peterson, morto el giorno dopo del scontro capitado subito poco dopo la partenza del Gran Premio d’Italia a Monza, nel setembre de quel 1978.
Andretti el ga vinto el suo unico mondiali in quei anni in cui, più che le prestazioni del bolide, valeva el coragio e la tecnica dei piloti. E in quel 1978 ghe ne iera de piloti coi fiochi: Niki Lauda (campion del mondo in carica) e John Watson i coreva sual Brabham- Alfa Romeo, Carlos Reutemann e ‘l mitico Gilles Villeneuve i difendeva i colori dela Ferrari, Didier Pironi e Patrick Depailler i guidava per la Tyrell (la scuderia che nel 1976 la gaveva garegiado con l’incredibile vetura P34 con sei rode, 4 davanti e due de drio, ve la ricorde?), ma anche l’ex campion del mondo James Hunt con la McLaren-Ford, i futuri campioni del mondo, Jody Scheckter (el diventerà nr.1 l’anno dopo con la Ferrari) e Alan Jones con la Williams, i grandissimi Jacques Laffite con la Ligier numero 26 e René Arnoux (futuro Ferrarista), i Taliani Vittorio Brambilla e Arturo Merzario, ma anche due grandissimi campioni a fine carriera, Emerson Fittipaldi e Clay Regazzoni, e due giovani de grande speranze che poi i gaveria fato la storia de l’automobilismo; Keke Rosberg e Nelson Piquet.
Tra tuti questi, per la Lotus- Ford (ve la ricordè, quela nera con la reclam dele sigarete John Player Special?) col numero 5 coreva Mario Andretti, col 6 el povero Ronnie Peterson. L’istrian Andretti in quela stagion el ga vinto ben 6 Gran Premi (Argentina, Belgio, Spagna, Francia, Germania, Olanda), rivando secondo a Long Beach (Stati Uniti). El campionato lo ga vinto con 64 punti, 13 in più del suo sfortunado compagno de squadra Ronnie Peterson e 16 più de l’argentin Reutemann dela Ferrari.
Mario Andretti el ga corso in tela Formula 1 dal 1968 al 1982 (con una pausa tra el 1972 e ‘l 1974) disputando 131 Gran Premi, vinsendoghene ben 12 e conquistando 19 podi. Nel 1971/72 e nel 1982 el ga corso anche per la Ferrari. Nel 1969 el gaveva vinto anche la mitica 500 miglia de Indianapolis.
Dopo la cariera in Formula 1, colaborando con suo fio Michael e con el fradel gemel Aldo (e suo fio John) el ga continuà a corer, continuando a vinser, in varie categorie (Formula Cart, Indycar, Nascar e CanAm) partecipando anche ala 24 Ore de Le Mans. Dal 1983 al 1994 el garegiava esclusivamente con la scuderia Newman-Haas, fondada da l’ator Paul Newman. Anche suo nipote Marco, fio de Michael, el xe pilota.
In tuto el ga corso in 897 gare e ‘l ghe ne ga vinte ben 111. Cussì nel 2005 el xe sta inserido in tel Automotive Hall of Fame (dedicado ai più bravi piloti dela storia) e nel 2006 el xe sta nominado Comendator dela Republica Italiana. Infati, per sua stesa considerasion, con Bruno Ascari el ce ancora l’unico campion de Formula 1 de lingua italiana. Che el parla el nostro dialeto.
Nel 2007 Mario Andretti, che intanto el gaveva comincià a produr vin in America con la sua Andretti Winery, el xe sta nominà sindaco del Libero Comune di Montona in Esilio.
Nato nel 1940, Andretti xe andà esule nel 1947 in Italia, prima in un campo profughi a Udine, poi a Lucca, dove che ‘l ga lavorà come aiutante in una oficina mecanica. Poi, nel 1955 la famiglia la se ga spostado a Nazareth, in Pennsylvania, e nel 1964 el xe diventà citadin american.
In un’intevista rilasada del 2008 Mario Andretti el ga dito de sentirse un omo col pasaporto american, ma col cuor istrian. El ga anche confessà che de note ogni tanto el se insogna ancora Montona. Su youtube xe publicadi due video in cui se lo vedi che el visita el borgo in do’che ‘l xe nato. Qua, in Istria.
Fonte: Istra24 – 24/03/2024
