di Aldo Fucci
Dopo ani de lontananza me son trovà per fortuna e per la bontà de chi me ga portà, a Fiume. Pareria una roba normal, ma non xe cussì. Me go trovà soto la Tore e go pogià la man aperta su la piera che xe sostegno del varco. Ridarè, ma me ga traversà come una scarica elettrica: una roba magica, incredibile. Ero soto la nostra Tore, el perno antico de la nostra città e go sentì prepotente la forza del “Genius loci“, quel che i antichi romani venerava, el spirito de la città.
Quando i romani fondava una città esplodeva in essa questo spirito che la permeava. Era el Genius loci, el dio protettor dei loghi, dei focolari. Mi, toccando la piera de la Tore, rendevo grazie, rendevo proprizia questa forza ignota che de millenni permea el logo, terra de San Vito al Fiume. Soto la Tore xe passade generazioni de fiumani, tuti i mii avi materni; quela Tore se ga carigà del spirito de la mia gente, de là i fiumani usciva da la città e i andava verso el mar, verso le barche, verso le navi. In una volta go come rivisto tuta la storia sofferta de la nostra città indove che la Tore era fondamerntale per la nostra gente. Go medità sui bassorilievi che la decora, sull’aquila bicipite scolpida, ma che manca su in zima, prima tajada, poi cavada del tuto e adesso i speta che la vegni a farse el nido. Ma ancora non la svola. Ghe xe solo cucai, quei che vorticosamente ghe gira sora. E mi speto che rivi, la nostra aquila bicipite. Go avù un brivido tocando la piera e go volù trasmetterghe con la man tuta la nostalgia che i mii veci esuli i gaveva de la nostra città, quando li go assistidi nel momento che i se spegneva lontani da ela. A lori ghe go tegnù la man su quei momenti. A la Tore, con la mia man, ghe go trasmesso el loro ultimo ricordo, affetto, pensiero: insomma al “Genius loci“ ghe go portà el vecio immutabile amor de chi esule, nell’ultimo istante la pensava con rimpianto.
Se pol girar el mondo, ma la propria tera resta sempre stampada in tel cor. Mi ghe credo al Genius loci, lo go sentì proprio là in te la piera del arco de la Tore, come se ghe gavessi riportà a casa tuti i mii veci costretti, da la vita, a restar lontani da la nostra magica Tore che palpita de la vita de tuti i fiumani che ghe xe passà soto e i se ga carigà del spirito del logo, anca se i xe andadi per el mondo, come che fazeva i nostri veci, prendendo le barche proprio là, fora de la antica nostra cara Tore, faro per i naviganti che tornava, beati lori, in porto.
La Tore: in Ela xe tuta la fiumanità presente, passada e futura, eterna e immutabile. Credeme. Provè a passarghe soto e la sentirè prepotente e viva, come la go sentì anca mi.
