Ricordando un neverin del 1947 (se la data xe giusta). Iera de domenica, mio zio Piero me portava pescar ogni volta che lui andava fora con la batana F6, costruida da mio cugin Maurizio Dag. La batana iera ormegiada sul quel buco fatto da la mina nel molo Stocco. La`vizin iera anca ormegiade la do barche che fazeva spola tra el molo scovazza e bagno Quarnero del dopoguera de estate, che trasportava i bagnanti per la traversada per do flike. Quel giorno iera bel sol e xe vignude anche le do zie in barca con noi per andar a pescar al "sottomarin" , iera dopo passa`mexo di`,un poco piu`tardi, che a un trato el el mar se scominzia a mover el zio Pierin se volta e guarda verso monte Maggior, el zuca su la corda col sasso quadrato che fazeva da ancora, de brivada el mete i remi in acqua e in piedi el scomincia a remar come mato. Quarda che neverin che arriva el dixe, e anca me ordina de star cucio a poppa e tegnirse per la cadena de ormeggio. Le onde diventa cavalloni,ghe la gavemo fata giusto per "cul" a entrar in porto e ficarse dentro l'ultimo buso de mina atacado al faro.
Arivadi dentro el buso el ne scariga a tera, a mi el me liga con un per de sugamani sul pasamani de fero a meta`scaleta che veniva xo da la pasegiada de sora al molo.
Lui se liga con la corda atorno la panza e se ancora aca lui con la corda lunga a la ringhiera , aspetando la grande onda che lo aiuti a tirar la barca in seca sul molo con l'aiuto de le zie. Tuto a un trato arriva un toco de giovane correndo dal vecio casamento mexo roto dei ex canottieri, el me grampa e correndo el me porta nel vecio edificio. Quando tuto se ga calmado el me porta indrio del zio, la barca iera sopra el molo,el ghe da una man a rimeterla in acqua. Mi iero carigo de fifa, Lui mete su el palo de la tenda parasol per vela, e con el remo a poppa el ne porta dentro.
Paioi , sessole , remi galeggiava per el porto, sul molo scovazza iera molta gente che zercava notizie, tra queste mia madre e sorele, a mi e zie el ne scariga la`, e poi pazifico el porta la barca a ormegiar.
Facio una nota: nel dopoguera diverse volte go remado intorno la Ramb 3 ma el zio dixeva de star a la larga perche la iera cariga de bombe, cussi non go mai arivà a cucar dentro el camin. Una de le tente storie che me ricordo del porto de Fiume.
Pino Bartolomé (el Lugaro)
