Come ogni ano, anche ‘sto ano son andà a Pola per le ferie. Apena rivà, son andà subito a far un giro, a veder quei posti dove che go più ricordi e, intanto che caminavo sul lungomare, per poco no me ciapa un colpo: se ferma una machina de quele antiche ma de lusso e chi smonta dala porta de drio? La principessa Sissi in persona. Intendemose, no la vera principessa, la moglie de sua maestà l’imperatore Francesco Giuseppe ma la nostra principessa Sissi, quela che noi ciamavimo cussì a Pola.
Impossibile, me son dito, no la pol esser ela, la dovessi esser morta zà de ani. Infati, quando son rivà più visin, me son acorto che i stava registrando una publicità e, quela che iera smontada de l’auto, iera una atrice, vestida come che se vestiva le done una volta. Ma la sorpresa xe stada forte e cussì me xe vignù in amente la storia dela principessa.
Iera la fia de de sior Francesco, barbier in pension, una signorina ormai avanti coi ani ma ancora vistosa e elegante. I diseva che ai tempi la iera belissima e la gaveva come amante un grande nobile, un principe austriaco. Purtropo, la storia la iera finida mal e la signorina, ancora bela ma de una beleza un poco sfiorida, no la se rassegnava e la spetava sempre che torni el suo principe azuro. La portava vestiti eleganti, de quela elegansa de una volta, cotole lunghe, calse de seda, camisete de pizzo, tute ricamade, capelini cola veleta. La iera sempre ben trucada, el viso bianco de cipria, la boca ben disegnada con el rosseto e un neo sula guancia destra. Col sol, la portava anche l’ombrelin. A vederla passar, iera un spetacolo, la pareva esser vignuda fora de un de quei romansi de amor de Liala. Per questo suo modo de vestir e de comportarse, la se gaveva guadagnà el nome de principessa e Sissi perché, de estate, la andava a far el bagno a Sissplatz, dove che, ai tempi de l’Austria, fazeva el bagno sua altezza imperiale, la vera principessa Sissi. Al bagno la vigniva con l’auto de piaza, la vecia Ansaldo de sior Bilucaglia. La se cambiava drento l’auto, intanto che sior Bilucaglia, con la sua bela divisa de autista e i mustaci a manubrio, fazeva la guardia che nissun no vegni a spiar. Co’ la vigniva fora de l’auto, la pareva smontar de una carossa, de quele con oto cavai. La portava un costume nero, acolado e lungo fina ai senoci ma, anche col solo costume, la gaveva un portamento regale. La andava sò per i scalini fina sula spiagia e la entrava in acqua. La caminava fina dove che la tocava e la scominsiava a nudar. La nudava “a dona”, stando ben ‘tenta de no bagnarse i cavei. La andava per un toco in fora, la tornava indrio e la vigniva fora de l’acqua. Sior Bilucaglia iera pronto a darghe el sugaman per sugarse, la se sugava e la tornava in auto. Là, la se cambiava e l’auto la ripartiva verso casa. Iera come una cerimonia e tuta la gente la se fermava a vardar. A ela no ghe interessava, no la vardava nissun, ansi, mi penso che no la vedeva nissun, la viveva come in un suo mondo e tuto el resto no contava gnente. Qualchedun contava anche altre storie, più picanti ma, se sa, la gente qualchevolta la xe cativa. Noi muli ridevimo tra de noi ma gavevimo anche rispeto per questa persona.
Chi che no rideva, inveze, iera sior Giacinto che gaveva l’orto in Pra’ Grande. Lui no’l se gaveva mai sposà perché per ani el gaveva dovù tender sua mama, una vecia autoritaria che lo comandava a bacheta e che no lo lassava mai andar de solo e far quel che’l voleva. Quando la vecia iera morta, lui iera zà avanti coi ani e, un poco per pigrisia e un poco perché col lavoro che’l fazeva, no ghe vanzava tempo per andar in giro, no’l gaveva più trovà la dona giusta per sposarse. Fina che un giorno, che el andava in marcato a portar la verdura col suo careto, el ga visto passar la principessa Sissi. Xe stà come una vision, un colpo de fulmine, el se ga fermà incantado e, de quel momento in poi, el suo desiderio più grande, el solo, unico e, proprio per questo, irinunciabile, xe sta quel de sposar la principessa. Iera un amor senza speransa, lui grande, grosso, el viso brusà del sol, le mani piene de cali per el lavorar in orto, ela palida, fine, sofisticada, elegante, iera dificile imaginarseli insieme. Ma Giacint
o no’l se rasegnava, el gaveva sì un aspeto ordinario, ma el iera de animo dolce, squasi romantico. El iera amante dela musica e el sonava el flauto. El gaveva scominzià a sonar in te la banda ma, dopo, el gaveva studià anche per conto suo, e el se gaveva imparà ben, anche tochi de musica classica e de opere. De estate, de sera, quando che la gente se senta davanti ala porta de casa a ciapar el fresco, sior Francesco, el papà dela principessa, el sonava la chitara e sior Giacinto fazeva el duetto con el flauto. Fazeva impression vederlo sonar, tuto ciapà, coi oci serai, che el suffiava drento el flauto. Ogni tanto el verzeva i oci e el butava sguardi languidi in alto, verso la finestra, dove che stava la principessa ma ela no lo degnava gnanche de un soriso.
Un altro cortegiador dela principessa iera sior Giacomo, che iera el paron de quela botega de biancheria e de stofe visin i Giardini. Lui iera restà vedovo che‘l iera ancora giovane e in un primo momento el pareva inconsolabile. El gaveva una fia, una bela putela e el viveva solo per ela. Po’ la fia la iera andada in colegio e lui iera restà solo. El iera ancora un bel omo, benestante, che la botega rendeva ben e nol gaveva vizi ma, de quando che la fia no la iera più con lui, el sofriva de grandi malinconie. No’l resisteva a viver de solo e alora, pian, pianin, el ga scominzià a pensar che forsi no iera ancora cussì tardi per rifarse una vita, che forsi el podeva trovar un’altra moglie che, per carità, no saria mai stada come la sua adorata Meri, quela santa dona, che dio ghe abrazi l’anima in paradiso, che no la poderà mai dimenticar, ma una persona che ghe staghi visin e ghe fassi compagnia. “E l’amor? L’amor no xe cussì inportante, el vero amor se lo trova una volta sola e mi lo go zà avudo, No poderò mai più volerghe ben a nissun come che ghe volevo ala mia povera Meri”. Cussì el diseva ma inveze, quando che el ga conossù la principessa, el ga dismentigà tuto, la Meri, la fia, la botega, el se ga inamorà come quando che’l iera un mulo giovane. Co’ la principessa la vigniva in botega, no’l capiva più gnente. El voleva servirla solo lui e per trategnirla de più el tirava fora tute le stofe che’l gaveva in magasin. La principessa la le vardava ma sensa grande interesse e, dopo un poco, la saludava e la andava via. La gaveva sempre questo suo far orgoglioso, de dona nobile e no la ghe dava confidensa a nissun.
El terzo inamorato, almeno per quel che se sa, iera el mulo Gino. Digo mulo perché, anche se el gaveva passà la cinquantina, Gino no’l iera sposà e el se comportava come se el fussi ancora un mulo de venti ani. El lavorava in arsenal e el iera bravo del mestier ma, per el resto, el viveva ala giornata e no’l ciapava mai gnente sul serio. Lui el iera sempre alegro, el cortegiava tute le done, al sabato el andava a balar fora per i paesi e tute ‘ste contadinote le iera inamorade de lui. Epur, anche lui el xe cascà come un perognoco, el se ga inamorà dela principessa e, de quela volta, no ghe ga più interessà de nissuna altra dona. Ala sera el se vestiva tuto elegante, col farfalin e el passava là dove che stava la principessa, sperando che la fussi in finestra per saludarla. El ghe mandava fiori e biglietini de amor ma ela gnente, no la ghe voleva saver.
La gente e le babe specialmente le gaveva una curiosità morbosa per questa storia. Co’ le se incontrava in marcato o de qualche altra parte, le se fermava a ciacolar e subito el discorso andava a finir sula prinicipessa e sui sui spasimanti. “Siora Ines, la sa che l’altra sera go visto el Gino tuto ben tapado, col farfalin e el capel de paia che’l passava soto la finestra dela principessa ma ela no la se ga fato veder e lui el xe andà via tuto rabiado” diseva siora Antonia, una baba informada su de tuto quel che sucedeva in cità. “Ma no, siora Antonia” rispondeva siora Ines,”ala principessa no ghe interessa el Gino, mi penso piutosto che gabi più possibilità sior Giacomo. Mia nipote Lidia, che la lavora là de lui. la me ga dito che quando che la principessa la vien in botega, lui passa dele ore con ela a farghe veder tute le stofe che’l ga in magasin.” “ Mah, no so”, diseva ancora siora Antonia “anche quel povero sior Giacinto, lo go visto in marcato, el xe sempre serio, via co’la testa, no’l par più lui. Cossa ghe farà ‘sta principessa ai omini?” “Eh, siora Antonia mia”, concludeva siora Ines, “ certe done le sa cossa far per istupidir i omini…no la me fassi dir come…”
Le babe le ciacolava e ogni scusa iera bona per, come che se disi, “agiunger una pesseta”, cussì che no se saveva più quel che iera vero e quel che iera fantasia.
Ma un bel giorno, o bruto, secondo i punti de vista, la principessa la ga savudo sorprender tuti: la xe sparida senza dirghe gnente a nissun e senza lassar tracia. El pare, sior Francesco, el iera disperà, el continuava a pianzer e lamentarse: “cossa farò mi de solo adesso che son vecio?” el diseva, “ la iera tropo bela e bona la mia Sissi”, perché ormai la ciamava anche lui cussì, “qualchedun me la ga portada via”.
I tre spasimanti se guardava mal l’un con l’altro, sospetandose a vicenda.
Le babe in mercato le gaveva trovà un altro argomento per le ciacole e se sentiva le storie più strambe: che la iera andada a farse suora de clausura, che la gaveva sposà per procura uno richissimo e la iera andada in Argentina, che la se gaveva inamorà de un acrobata e la iera andada via con la carovana del circo. Ma la storia che ghe piaseva de più a tuti iera quela che el suo principe azuro, el nobile austriaco iera tornado a ciorla e che i iera andai a viver insieme in un belissimo castel in qualche posto sule montagne austriache.
L’amor vinzi sempre e le storie a lieto fine xe sempre quele che piasi de più.
Roberto Stancich
