L’Istria xe anche una tera de misteri. O magari de bale. Tra i più famosi xe quel ligado al famoso pirata inglese Henry Morgan che, dopo gaver navigà in tel Canal de Leme, nella seconda metà del XVII secolo, con l’aiuto de un prete, el gavessi sconto un grande tesoro a Docastei che in quel momento iera da poco un logo abandonà. Quei che dala storia i pretendi tropo i disi anche che sto depredador de navi dai Caraibi al Mediteraneo el se gavessi adiritura fermà a viver in Istria, e la prova saria che un paesotto vicin de Docastei el se ciama Morgani (Mrgani), proprio in suo onor.
Un altro mistero xe quel del magico aprodo a Rovigno, nell’anno 800, del sarcofago con dentro Santa Eufemia, morta, in quel momento, xa da 500 anni. El saria rivà nientemeno che da Costantinopoli, e come che tuta quela piera la gavessi fato a galegiar, no se sà.
De Rovigno, almeno per mi, xe sai più interesante el mito de l’isola de Cissa, che qualchedun, no sensa e esagerar, la ciama l’Atlantide de l’Adriatico. Sta isola de l’arcipelago rovignese la saria sprofondada nel medio evo, o adiritura prima, in epoca tadoromana, per via de teremoti e maremoti. Sto mito el xe un fià diferente de altri inventai de santa pianta perchè, oltre che grazie ale credenze del popolo, el sta in pìe anche su qualche fonte storica. Resta el fato che el xe carigo de domande sensa risposta. Ghe vol un britola bona per divider la tanta fantasia dala poca verità che conossemo.
Dove stava sta isola (se conta che la saria stada nela zona dela seca Rubino, a sud de l’isola de San Giovanni in Pelago)? Quando la xe sprofondada? Iera un’isola abitada, e magari anche sede diocesana come che pareria da qualche documento medieval? Opur, come che xe sta scrito, iera el logo dove che lavorava una tintoria e una manifatura per i vestiti de l’esercito roman?
E no sarà forsi che qualche reliquia de Santa Eufemia la se trovava xa da tempo a Cissa e che la saria rivada a Rovigno proprio dopo l’inabissamento de sta fantomatica isola ? Dale cronache del tempo savemo che lo zona la saria stada colpida da un maremoto proprio poco prima del 21 luglio de l’800, co’ a Rovigno xe rivà per mar el sarcofago de Sant’Eufemia. Se no se vol creder a l’incredibile storia del sarcofago galegiante, forsi podessi esser sta che i stessi abitanti de Cissa, per meter in salvo le reliquie della santa, i li gavessi spedidi in qualche modo per mar a Rovigno, magari posando el sarcofago su travi de legno.
Questa possibilità la vien perà smentida da un’altra version che la disi che Cissa la saria sprofondada quasi meso secolo prima, per via de un teremoto capità el 16 luglio del 304, el giorno giusto co’ xe morta la martire Sant’Eufemia. Insoma, un altro stratagema per ligar Cissa e la santa patrona de Rovigno.
Quel che xe sicuro, xe che nel VI, VII secolo e fin ala metà dell’VIII secolo la costa istriana la xe stada colpida da teremoti e maremoti. Sta roba la basta per farne creder nela storia de Cissa? Mi diria de no, cussì come che che xe dificile creder anche in tele storie dei pescadori che i gavessi sbregà le redi sui resti de l’isola inabissada in fondo al mar. Quel che invesse rendi la storia in qualche modo credibile xe che el vecio nome de Barbariga xe Punta Cissana.
Che sia coss che ga de esser, in ogni caso xe bel star sul piassal davanti ala cesa de Santa Eufemia, sul colmo dela citavecia de Rovigno, guardar in diression de San Giovanni in Pelago, calarse nel mito e imaginarse un “isola che non c’è”.
Silvio Forza
Fonte: Istra24 – 13/07/2024
