Ci siamo lasciati San Nicolò alle spalle e Natale sta per arrivare. Da Recco, il fiumano Rudi Decleva ci fa sapere quanto segue:
“Quà a Recco, vizin de Genova, xe una signora fiumana che la xe capace de organizar el impossibile. Ogni anno essa la organiza una coriera per andar a Fiume, poi una magnada per i Santi Vito e Modesto e poi in dicembre, per el San Nicolò, non solo la magnada ma anca i regali. Sta donna la se ciama Licia Pian. Non la gà fronzoli ma fatti. Come se dixeva fra noi? “Ciacole no fà fritole”, vera verità.
Pensè che se gavemo trovado in 90 profughi fiumani spudadi, che tanti non i se trova gnanca intei Raduni uficiali dela “intelighenzia” de Roma. In un bel restaurant, che se ciama “Alfredo”, con una bela bandiera fiumana inpiccada in sala. Ognidun el deveva portar un regalo, in modo che ognidun gaveria potudo gaver uno diverso, e così poterse sentir muletto, gratificado dal Santo de Bari, quel che el 5 de vigilia, come che sarìa stado ogi, el se presentava in pergolo dal Curatolo in Corso, o dal Moskowitz in Piazza Regina Elena. Solo che non gò sentido nessun zigar “a mi, a mi”, perchè venindo via de Fiume semo cressudi.
El morbin non el mancava e ai diversi tavoli tuti i cantava le nostre bele canzoni fiumane dei tempi dei nostri veci e quele nostre de mularia. La canzon che la gà avudo più sucesso xe stada “El put pourì”, che non so cossa che vol dir, ma xe una raccolta de tochetini dele vecie antiche. Finido de magnar, xe passado per i tavoli un giovane travestido de San Nicolò, per distribuir i regali. A mi me xe andado molto ben perchè gò portado 6 bei cachi del mio albero, che ancora i se deve maturar, e me xe capitada indrio una bela confezion de ciocolatini, già pronti per magnar. Non gò sentido nessun lamentarse per gaver trovado carbon o scibe.
Ghe gò domandado ala signora Licia se forsi la gaveva i nomi de quei che era presenti ma non era possibile scriverli tuti. E così vojo ricordar qualchedun che son riussido a individuar: el Emerico Radmann, che adesso che el Mohoratz non el stà ben, el tien in piedi el Comitato Venezia Giulia, el storico, molto aprezzado, Sandro Pellegrini, Ennio Celli de Busalla, la signora Petricich, la signora Marceglia, vegnuda da Milano, Giulio Chinchella, che el papà ghe era diretor dei comercianti a Fiume, el Com.te Lallo Cosatto, la Orietta Compassi, moglie del Alfio Mandich che tanto el ne manca, e last but not least, el Oliviero Nardi, stella del Pontedecimo. Se Dio me dà salute, el anno prossimo me scriverò de più nomi.
Ciao Rudi
